News and Events

Dk.Shein,afungua Mkutano wa 17 wa Baraza la Mawaziri Umoja wa Nchi za Mashariki na Kusini mwa Afrika


RAIS wa Zanzibar na Mwenyekiti wa Baraza la Mapinduzi Mheshimiwa Dk. Ali Mohamed Shein amezitaka nchi za Umoja wa Mashariki na Kusini mwa Afrika wa Kudhibiti Utakasishaji Fedha Haramu (ESAAMLG) kufanya kazi kwa karibu na Jumuiya hiyo ili ziweze kupambana na uharamia huo unaoathiri sekta za kiuchumi na maendeleo kwa nchi wanachama.

Dk. Shein aliyasema hayo huko katika ukumbi wa Hoteli ya Zanzibar Beach Resort, Mazizini nje kidogo ya mji wa Zanzibar wakati akifungua Mkutano wa Umoja wa Nchi za Umoja wa Mashariki na Kusini mwa Afrika (ESAAMLG) wenye mada kuu za udhibiti katika utakasishaji wa fedha haramu na ufadhili wa ugaidi zitajadiliwa.

Alisema kuwa kuwepo kwa mfumo wa fedha haramu kunaathiri sana juhudi za Serikali katika upatikanaji wa rasilimali fedha ambazo zinaweza kutumika vizuri na kuelekezwa katika utekelezaji wa miradi mbali mbali ya maendeleo kwa nchi za Umoja huo.Alieleza kuwa Jumuiya hiyo ina jukumu kubwa la kupambana na vitendo vya utakasishaji wa fedha haramu pamoja na kudhibiti vitendo vya kuziwezesha kifedha taasisi na vikundi vinavyojishughulisha na masuala ya kigaidi.

Rais Dk. Shein alieleza kuwa ipo haja kwa nchi wanachama kuweka mikakati imara ya kuweza kufahamu uhusiano uliopo baina ya utakasishaji wa fedha haramu na masuala ya kigaidi na kusisitiza haja ya kuwepo kwa mashirikiano ya pamoja katika kudhibiti vitendo hivyo.Aliongeza kuwa iwapo nchi zote wanachama 18 wa Jumuiya hiyo zitaelekeza nguvu na juhudi kubwa katika vitendo hivyo basi vitaweza kupata mafanikio yaliokusudiwa sambamba na malengo ya Jumuiya hiyo.

Alieleza kwamba nchi za ukanda wa Afrika Mashariki na Kusini zingeelekeza nguvu zake vizuri na kutumia vyema rasilimali zake na kudhibiti vitendo hivyo zingeweza kwenda katika kasi sawa na nchi za Malaysia, Singapore, Malta na Korea Kusini ambazo zimepata uhuru katika wakati mmoja na nchi za Jumuiya hiyo.

Pamoja na hayo, Rais Dk. Shein alieleza kuwa nchi wanachama wa Jumuiya hiyo zinakabiliwa na changamoto kadhaa zikiwemo rushwa, ukwepaji wa kodi, usafirishaji wa fedha nje ya nchi, biashara ya dawa za kulevya,uharibifu wa mazingira, utengenezaji wa fedha kinyume na sheria,vitu bandia pamoja na udanganyifu katika masoko ya hisa na changamoto nyenginezo

Aliongeza kuwa ipo haja ya kuungana na kuwa na sheria na mikakati madhubuti itakayowezesha nchi wanachama kuhakikisha kuwa mapato yanayopatikana kutokana na vitendo hivyo haramu yanadhibitiwa na kuhakikisha hayatumiki katika kuendeleza vitendo hivyo.Aidha, Dk. Shein alieleza juhudi zilizochukuliwa na Tanzania katika kupambana na vitendo hivyo ikiwa ni pamoja na kupambana na rushwa,utakasishaji wa fedha haramu, ugaidi na masuala mengine yalio kinyume na taratibu za nchi kwa kutunga sheria mbali mbali kwa ajili ya kudhibiti vitendo hivyo.

Alizitaja baadhi ya miongoni mwa sheria hizo ikiwa ni pamoja na Sheria ya kudhibiti vitendo vya ugaidi, Sheria ya kudhibiti utumiaji mbaya wa mitandao, Sheria ya kudhibiti dawa za kulevya, Sheria ya kupambana na kudhibiti rushwa na sheria nyenginezo.Vile vile, Dk. Shein alisema kuwa Tanzania imeweza kuanzisha taasisi mbali mbali za kudhibiti vitendo hivyo ikiwemo Taasisi katika Mahakama inayohusiana na kupambana na Rushwa na Uhujumu Uchumi, Taasisi za kupambana na Dawa za kulevya na nyenginezo na kuzitaka nchi wanachama kuzijengea uwezo taasisi kama hizo katika nchi zao.

Pamoja na hayo, Dk. Shein aliwahakikishia wajumbe hao wa mkutano huo kuwa Tanzania itaendelea kutoa ushirikiano unaohitajika ili kuhakikisha Umoja huo unaendelea kutekeleza majukumu yake ipasavyo na kwa ufanisi mkubwa zaidi.Dk. Shein alitumia fursa hiyo kutoa pongezi kwa Mwenyekiti aliyemaliza muda wake katika Umoja huo ambaye pia, ni Waziri wa Fedha na Uchumi wa Jamhuri ya Zimbwabwe Patrick Chinamasa aliyemaliza muda wake mwezi Agosti mwaka huu na nafasi yake kushikwa na Waziri wa Fedha na Mipango wa Jamhuri ya Muungano wa Tanzania Dk. Philip Isdor Mpango.

Sambamba na hayo, Dk. Shein aliwakaribisha Zanzibar wajumbe hao wa mkutano na kuwataka kuitembelea na kuona mazingira yake sambamba na vivutio mbali mbali vilivyopo.

Nae Waziri wa Fedha na Mipango wa Jamhuri ya Muungano wa Tanzania Dk.Philip Isdor Mpango alizihakikishia nchi wanachama za Umoja huo kuwa Tanzania itauendeleza kwa nguvu zake zote umoja huo ikiwa ni pamoja na kuongeza ushirikiano zaidi kati ya nchi wanachama pamoja na kuongeza ofisi sambamba na kuwaimarisha watendaji wake.

Mapema Waziri wa Fedha na Maendeleo ya Uchumi wa Zimbabwe Patrick Chinamasa alizitaka nchi wanachama kuongeza nguvu katika kutoa michango yao pamoja na kuziimarisha taasisi za kupambana na kudhibiti utakasishaji wa Fedha haramu katika nchi hizo ili Umoja huo uzidi kuimarika na kuleta manufaa yaliokusudiwa.

Waziri Chinamasa alieleza kuwa katika mkutano huo mbinu na mikakati mbali mbali itakayosaidia kudhibiti utakasishaji fedha haramu na ufadhili wa ugaidi utajadiliwa,hatua ambayo italeta matokea mazuri na kuongeza kasi ya ukuaji wa uchumi na kufikia maendeleo yanayotarajiwa katika nchi wanachama.

Tanzania kwa hivi sasa ni Mwenyekiti wa Umoja huo ambayo ni miongoni mwa waanzilishi wa Umoja huo ambao kwa hivi sasa una wanachama 18 kutoka wanachama 7 waanzilishi baada ya kupokea kutoka Jamhuri ya Zimbabwe iliyomaliza muda wake Agosti 2017.