Rais wa Zanzibar na Mwenyekiti wa Baraza la Mapinduzi, Dk. Hussein Mwinyi, leo Oktoba 23, 2021 amekutana na kufanya mazungumzo na Rais wa Jamhuri ya Burundi Jenerali Evariste Ndayishimiye aliyeongozana na Ujumbe wake maalumu katika ziara ya siku moja hapa Zanzibar.
Pamoja na makabaribisho rasmi ya kitaifa, Mhe. Rais Dk. Mwinyi amempongeza Rais Ndayishimiye kwa jitihada zake za kudumisha Amani na Usalama nchini Burundi na juhudi za kukuza Uchumi na Mahusiano na Mataifa mbalimbali hususani majirani wa Jumuiya ya Afrika Mashariki.
Aidha, Rais Dk. Mwinyi ametumia fursa hiyo kuwakaribisha wafanyabiashara wa Burundi kuja kufanya biashara Zanzibar hususani katika sekta ya Uchumi wa Buluu na Bidhaa za Baharini.
Kwa upande wake Rais wa Burundi, Jen. Evariste Ndayishimiye amemshukuru Rais wa Jamhuri ya Muungano wa Tanzania, Samia Suluhu Hassan na Rais wa Zanzibar Dk. Hussein Mwinyi kwa mwaliko wa kuitembelea Tanzania huku akisema ni furaha kwake kufika Zanzibar kwa mara ya kwanza na amevutiwa na mandhari nzuri ya Zanzibar.
Mhe. Jen. Ndayishimiye ameeleza kuwa anaishukuru Tanzania kwa kuwasaidia raia wa Burundi ambao walikimbilia Tanzania baada ya machafuko nchini mwao.
Aidha. Rais Jen. Ndayishimiye ameongeza kuwa ipo haja ya Zanzibar kuisaidia Burundi katika sekta ya uvuvi kwa kuwapatia wataalam watakaosaidia kuwapa ujuzi wa namna bora ya kuvua.
Katika ziara hiyo ya siku moja, Rais wa Burundi na ujumbe wake wametembelea maeneo ya vivutio vya Utalii ndani ya Mji Mkongwe na Soko la zamani la Biashara ya Utumwa katika Kanisa la Kiangalikana maarufu kanisa la Mkunazini. Pia ametembelea Ujenzi wa Nyumba katika Mji Mpya wa Fumba nje kidogo ya mji wa Zanzibar.